ამინდის პროგნოზი

ბმულები

2012 წლის 28 მაისიდან 3 ივნისის ჩათვლით აჭარაში მიმდინარეობდა ტურიზმის კვირეული, რომელშიც ჩვენი სკოლაც მონაწილეობდა. 28 მაისს გავედით პლაჟის დასუფთავების აქციაზე ბათუმის ბულვარში.

18 მაისს მთელი ქვეყნის მასშტაბით გამოსაშვები კლასის მოსწავლეები სკოლის დასრულებას აღნიშნავდნენ. ტრადიციულად მე-12 კლასელები სკოლაში ნახატებიანი პერანგებითა და წინსაფრებით გამოცხადნენ, რომლებზეც ისინი ერთმანეთს სამახსოვრო წარწერებს უკეთებდნენ. გაკვეთილების შემდეგ XIIბ კლასის მოსწავლეებმა სააქტო დარბაზში გამართეს კონცერტი, ბოლოს მოსწავლეებს მისასალმებელი სიტყვით მიმართა სკოლის დირექტორმა გივი ხალვაშმა.

14 მაისს თამარ მეფის ხსენების დღესთან დაკავშირებით სკოლის სააქტო დარბაზში ჩატარდა კონფერენცია თემაზე „თამარი და საქართველო“. ეს  იყო ბათუმის #14 საჯარო და ჩვენი სკოლის ერთობლივი ღონისძიება. კონფერენციის საპატიო სტუმარი იყო პროფესორი კახა სურგულაძე, რომელმაც სიტყვით მიმართა კონფერენციის მონაწილეებს და შეახსენა თამარის ეპოქის სიდიადე, რომ „იყო დრო და ქართველობით თავი მოგვიწონებია“.

8 მაისს VIII-ა კლასის მოსწავლეები „მოხალისეთა კლუბის“ წევრებთან ერთად  ეწვივნენ ბათუმის სათნოების სახლს. მათ მიულოცეს გამარჯვების დღე სათნოების სახლის მობინადრეებს და გაუმართეს პატარა კონცერტი. ბოლოს გადასცეს შეგროვილი თანხა, რომელიც მოსწავლეებმა მათი ნამუშევრების გაყიდვის შედეგად შეაგროვეს. ღონისძიებას ხელმძღვანელობდა პედაგოგი   ნელი აფხაზავა.

8 მაისს სკოლის სააქტო დარბაზში გაიმართა საქართველოს თავდაცვის სამინისტროს წარმომადგენლებთან შეხვედრა. ინსტრუქტორებმა მოსწავლეებს გააცნეს სამინისტროს დაქვემდებარებაში არსებული ჯარების სახეობები. აჩვენეს სლაიდები ეროვნული თავდაცვის აკადემიისა და კადეტთა კორპუსის შესახებ. მოსწავლეებმა დაათვალიერეს საქართველოში გამოშვებული სამხედრო ტექნიკა, კერძოდ სამხედრო მანქანა „ლაზიკა“

3-8 მაისს ბათუმში მიმდინარეობდა ფოლკლორის XI სერთაშორისო ფესტივალი „ოქროს დელფინი 2012“. ფესტივალში მონაწილეობდა 10 ქვეყნის, აგრეთვე საქართველოს სხვადასხვა ქალაქის ფოლკლორული ანსამბლები, ერთ-ერთ მათგანს ჩვენმა სკოლამაც უმასპინძლა. ეს იყო თბილისის მერიასთან არსებული ქორეოგრაფიული კოლეჯის, ილიკო სუხიშვილის სახელობის ქორეოგრაფიული ანსამბლი „თეთრონი“. ხაელმძღვანელები: ბადრი ცხოვრებაული და ნანა ივანიძე.

50 თბილისელი ბავშვი განთავსდა ჩვენი სკოლის მოსწავლეთა ოჯახებში. დაუვიწყარი იყო მათთან ერთად გატარებული დღეები.

5 მაისს სასტუმრო შერატონში გაიმართა ბათუმის მოსწავლეთა კინოფესტივალის გამარჯვებულების დაჯილდოვება. კინოფესტივალში მონაწილეობას იღებდნენ საჯარო და კერძო სკოლების VI-XII კლასის მოსწავლეები, რომლებსაც ევალებოდათ მოკლემეტრაჟიანი ფილმის გადაღება. აღნიშნულ კინოფესტივალში მონაწილეობდა მე-8 საჯარო  სკოლის ჯგუფიც. XII–გ კლასის მოსწავლის, ოთარ მღებრიშვილის გადაღებული ფილმი, "იბრძოლე მიზნისთვის" მეორე ადგილზე გავიდა და პრიზის სახით შემოქმედებითმა ჯგუფმა 400 ლარი მიიღო. ასევე ამ ფილმმა გაიმარჯვა ნომინაციაში "საუკეთესო რეჟისურა".

 

სკოლის სტრატეგიული ხედვა

შევქმნათ ისეთი გარემო, სადაც ყველა მოსწავლე შეძლებს ცოდნის შეძენას, გამოყენებას, საზოგადოებრივი ცხოვრებისათვის საჭირო უნარ–­ჩვე­ვების გამომუშავებასა და საკუთარი პოტენციალის სრულფასოვან გამოვლენას.

სკოლის მისია

აღზარდოს  დამოუკიდებელი, შემოქმედებითი, საკუთარი შესაძლებობის მუდმივად განვითარების შემძლე, ინფორმირებული და ამ ინფორმაციის ადეკვატურად გამოყენების უნარის მქონე, ბუნებრივი გარემოს დამცველი, კანონმორჩილი და ტოლერანტი მოქალაქე.

სკოლის  ღირებულებები

უსაფრთხო და წამახალისებელი გარემო; განათლების სრული მისაწვდომობა და ერთნაირი მოლოდინი ყველა მოსწავლისაგან; განათლების მაღალი ხარისხი; მასწავლებელთა უწყვეტი პროფესიული განვითარება; კოლეგიალური მხარდაჭერა და თანამშრომლობა; შრომითი და საშემსრულებლო დისციპლინა.